المخرج محمد سامي
كشف المخرج محمد سامي عن رأيه في اتهام البعض لأعماله بأنها للاستهلاك السريع، حيث أكد أنها لو للاستهلاك السريع ما كانت قد بقيت أعمال مثل الأسطورة والبرنس حتى الآن.
وأضاف في لقائه مع برنامج “تفاعلكم” على قناة العربية: «لو أعمالي للاستهلاك السريع، مكناش هنبقى فاكرين الأسطورة والبرنس وآدم لحد دلوقتي».
وتابع: «الناس اللي بتقول كده هي اللي بتكون زعلانة إنها محققتش نفس النجاح فبتحاول تقلل من نجاح الآخرين».
وردًا على سؤال «أقوى جملة درامية كتبتها»، أجاب: «كل واحد بيشوف الناس من عين طبعه».
وتابع: «الناجح في مصر دايمًا بيُدعم، لكن الناجح في العالم الحاقدين بيحاربوه، الناجح في مصر بيُدعم من الجميع».
وردًا على سؤال «فيلم أو مسلسل كنت أتمنى أن يكون لي ؟» أجاب: «لو مسلسل.. أي مسلسل للراحل محمود عبدالعزيز رحمة الله عليه، لو فيلم فهو أي فيلم للفنان عادل إمام وللكاتب الراحل وحيد حامد».
تحدث المخرج محمد سامي، عن الجانب الأسري في حياته، الذي يشمل بناته الاثنين، ووالده ووالدته، وزوجته الفنانة مي عمر.
وقال محمد سامي في تصريحات تليفزيونية: بناتي الاتنين معلمني الأدب، وأكاد أكون أكتر أب شخصيته ضعيفة أمام ولاده، وحشري جدا في حياتهم عشان حابب أكون ملم بكل تفاصيلهم، بنزل أشتري معاهم اللبس وأشوف مذاكرتهم، وبنتي الكبيرة واخدة شخصيتي بالمللي، وسيلين الصغيرة شبه مي شكلا وموضوعا.
ثم تطرق محمد سامي للحديث عن والده ووالدته، وقال: أنا تحت جزمة أمي وأبويا هما حياتي، ولما بتجيلي مشكلة مش بعيط غير في حضن أمي، هي مصدر قوتي وأول حد صدق فيا، وبحكي لها كل حاجة يمنعني كبريائي إني أقولها لغيرها، ومراتي شريكة حياتي طبعا بس مفيش راجل بيحب يبين ضعفه وانكساره قدامها.
وتابع سامي مشيرا إلى قوة العلاقة التي تجمعه بأهله، قائلا: إحنا بيوتنا ورا بعض وحياتنا كل يوم مع بعض، إحنا مش عيلة بتسأل على بعض في الأعياد بس، إحنا كل يوم مع بعض وبنحكي كل حاجة لبعض، ومي مراتي وروحها في أمي وهي بتدافع عنها لما يحصل مشكلة بينا.
محمد سامي يتحدث عن زوجته مي عمر
كما كشف عن الأشياء التي جذبته في زوجته مي، وقال: أول حاجة لفت نظري في مي هو جمالها، وعندها حياء، ومعندهاش طباع معينة وحشة في ستات، زي إنها مش حشرية ومش بتغير على كل حاجة، بتغير طبعا بس من غير ما تهزق نفسها وتزعل كل شوية، وبتعزز قيمة زعلها وكلمتها.
وأضاف: هي عارفة إن كل الفنانات اللي بصور معاهم هما إخواتي وصحابي، وآخر عملين بينا هي اشتغلتهم بعد ما اتحايلت عليها، عشان بتشوف إن إيه لازمتها نشتغل مع بعض مدام الناس بتتكلم علينا.
وقال محمد سامي خلال تصريحات تليفزيونية: هالة صدقي أستاذتي الموهوبة الخلوقة اللي كانت لمانا كلنا في حضنها، وهي العمود الفقري للمسلسل، كان معانا خبرة وأخلاق وذوق، وبشكرها إنها يوم ما قولتلها تعمل دور أم لناس كبيرة سنا وافقت وقالت أنا ممثلة.
وتابع: هي ست جميلة وخفيفة الظل ويا بختي إن يتحط في تاريخي إني اشتغلت معاها، ومن حق الممثلين أصحاب القدرات دي إنهم يتعاملوا مع ناس تقدر تطلع القدرات دي منهم.
