نيللي كريم: مش قادرة أعمل حاجة في رمضان 2024 فيها عمق.. وأنا طماعة وبحب أقدم كل حاجة

الفنانة نيللي كريم

تحدثت الفنانة نيللي كريم عن تعاونها مع الفنان محمد فراج في فيلم فوي فوي فوي، وعن مشاركتها في الماراثون الرمضاني 2024.

وقالت نيللي كريم خلال تصريحات تليفزيونية: بستمتع بالقصة الحلوة وبالدور الحلو وبحب اشتغل مع ناس فنانين بيحبوا الفن بجد ودي متعتي.

وعن تعاونها مع الفنان محمد فراج للمرة الخامسة، أضافت نيللي كريم: اتعاملنا مع بعض كتير واللي بيفرق بردو المخرج ليه عامل كبير في اللوكشين والقصة، لأن كل مخرج ليه طابع خاص وليه طلبات معينة وليه رؤية معينة.. أنا بستمتع بالتجارب دي كل مرة، وفراج بيعمل كل مرة شكل جديد ومختلف ومتعة أنك تشتغل مع فنانين بيحبوا الفن.

نيللي كريم: الكيميا بيني وبين يسرا فظيعة.. ومش قادرة أعمل حاجة فيها عمق

وعن تجربتها مع الفنانة يسرا في مسلسل روز وليلى، أوضحت نيللي: الكيميا بيني وبين يسرا فظيعة كنا بنضحك برا الكواليس وجوا الكواليس وبنعيد بسبب الضحك، وبحبها على المستوى الشخصي.

وعن تفاصيل مشاركتها في رمضان 2024، استكملت نيللي حديثها قائلة: بحب الكوميدي والأكشن والتراجيدي وأنا طماعة شويه بحب أقدم كل حاجة.. وهعمل في رمضان 2024 مسلسل كوميدي مشتاقه للكوميديا مش قادرة أعمل أي حاجة فيها عمق.

وقالت نيللي كريم في تصريحات تليفزيونية: هناك أعمال بيبقى مهم أكون فيها، لأني بكون قارئة مستقبلها، وبحس إن الأعمال دي هيبقى لها صدى، مش فيلم تجاري يعمل الضجة ويجري، ولكن فيلم ممكن تتفرج عليه أكتر من مرة، أنا بدور على العمل الكويس واللي يسيب أثر في أعمالي ومش بحجم الدور.

وأضافت نيللي: العمل الكويس ده بيتطلب منه حاجات كتيرة أوي يتطلب منه القصة، والفكرة والإخراج والإنتاج وأنه يكون كامل متكامل وعمره ما هيكمل إلا باكتمال العناصر، لا المخرج لوحده كفاية ولا الممثل لوحده كفاية ولا المنتج لوحده كفاية.

وأضافت نيللي أنها شاركت في العديد من الأعمال من قبل بأدوار صغيرة في بطولة جماعية، ومنهم في فيلم واحد صفر و678 واشتباك، مؤكدة على أنها تسعى دائما للأعمال التي تترك أثرا

آخر أعمال نيللي كريم 

يعد فيلم فوي فوي فوي آخر الأعمال التي شاركت فيها نيللي كريم، وضم العمل عدد كبير من النجوم أبرزهم: محمد فراج، طه دسوقي، محمود حافظ، وعدد آخر من الفنانين، وهو من تأليف وإخراج عمر هلال.