الناقد الفني طارق الشناوي
انتقد الناقد الفني طارق الشناوي، الفنان مصطفى كامل نقيب المهن الموسيقية، لتضامنه مع الفنان مصطفى قمر ضده بعد أزمتهما الأخيرة، مشيرًا إلى أن هجوم نقيب الموسيقيين عليه يعتبر أخطر بكثير مما فعله قمر.
وقال طارق الشناوي في تصريحات صحفية: مصطفى كامل نقيب الموسيقيين بيهاجمني.. إزاي نقيب مش بيدرس الموقف القانوني للعضو بتاعه ويعرف أنه بيقع تحت طائلة السب والقذف العلني! بالتالي النقيب مش مذاكر قانون ولا منطق.
وأضاف طارق الشناوي: كان لازم قبل ما يتكلم يدرس موقف العضو اللي عنده قانونا وهل يجوز الكلام اللي قاله وإذا كان لا يجوز فإزاي يدافع عن مواطن وحد بينتهك أعراض.. أنا مستغرب نقيب يعمل كده ودي مشكلة كبيرة أخطر بكتير من أن مصطفى قمر يتهور لأن الأخطر أن النقيب نفسه يعمل كده، وكان لازم يدرس الموضوع قانون قبل ما يبدأ يقول كلام ولازم يفهم هو بيقول إيه.
في سياق متصل، كشف طارق الشناوي أنه تقدم بشكوى لنقابة الصحفيين ومن ثم سيتخذ الإجراءات القانونية، مضيفًا: لازم النقابة اللي بينتمي ليها تكون طرف، وأنا قدمت التفاصيل لنقابة الصحفيين ومنتظر الخطوات لأن لازم يكون فيه غطاء من النقابة اللي بتدافع عن حرية التعبير.
وأكد طارق الشناوي أنه لن يتنازل عن موقف، قائلًا: واحد تطاول وده اسمه سب وقذف علني واللي يردعه القانون لأن القانون بيجرم السب والقذف العلني وبيبيح النقد وده ماكانش مقال ده سؤال وإجابة في برنامج.
وأوضح طارق الشناوي: كل ما قلته إن الفيلم من أسوأ الأفلام وقلت أن مصطفى قمر بدأ ما يبقاش في الوهج اللي كان فيه وبدأ يفقد بريقه ودي مش شتيمة لأن الشتائم حاجة والنقد حاجة وكل كلامي تحت سقف النقد الفني وكان ممكن يرد ويقول أنا عامل أعظم فيلم حقه ولكن ما يتشتمش، مختتما: أنا مع العدالة والمنطق وحرية التعبير والنقد.
استنكر الناقد الفني طارق الشناوي هجوم الفنان مصطفى قمر عليه بعد انتقاده له ولفيلمه الأخير، مشيرًا إلى انه سبق وهاجم محمد هنيدي عن فيلمه الأخير وكذلك تامر حسني ومحمد منير ولم ينزعج أحد منهم.
وقال طارق الشناوي في لقاء مع إي تي بالعربي: أنا هاجمت تامر حسني في آخر أفلامه ما زعلش بالعكس كلمني في التليفون وكذلك محمد هنيدي هاجمته في فيلمه الأخير واتقابلنا في مهرجان الدراما ومحمد منير كان ليا انتقادات على بعض أعماله.. هل زعل اطلاقا.. لو عاوز يطلع من الكبوة يتعظ من كل الأسماء دي.
وأضاف طارق الشناوي: ليا الحق أني اتكلم عن مصطفى قمر كمطرب مش الفشل ده بتسمعه بودنك وله علاقة بالحفلات.. وفين أغانيه اللي بتنجح؟ وفيه تلات أغاني طرحها في الفيلم هل الناس رددت حاجة منهم.. فيه هزيمة فنية بيعيشها وبيواجهها وهو بعد كثير عن المقدمة اللي كان فيها لأنه كان مطرب واعد وومثل واعد.
