كتبت: ياسمين ياسر
كشفت الممثلة المصرية إيمي طلعت زكريا عن أسماء الممثلين الذين تحب أن تعمل معهم، حيث تمنت العمل مع الممثل المصري الزعيم عادل إمام، وقالت: “أنا كان نفسي أشتغل مع الزعيم عادل إمام لكن ده محصلش اشتغلت مع سمير غانم وحسن يوسف، طبعًا ووقفت قدامهم على خشبة المسرح ده بالنسبة لي أنا كدا اكتفيت”.
وتابعت: “نفسي أشتغل من الجيل ده طبعًا من أذكى الفنانين اللي أنا بشوفها، وهو نجم في حتته وبرافو عليه جدًا ونفسي أشتغل معاه أحمد مكي، ممثل ذكي، مبيتكلمش كتير على الفاضي، بيشتغل وبِينجح أي حد بيشتغل معاه، يعني بيومي فؤاد، محمد سلام، ناس كتير جدًا اشتغلوا معاه ونجحوا، ونفسي جدًا أشتغل معاه، ورحمة وكل الناس دي”.
وأضافت: “هو بيحب يساعد الممثل، مبيحبش يبخل على الممثل بأي حاجة فنفسي أشتغل مع أحمد مكي جدًا”.
وكشفت عن علاقتها بالفنانة هنا الزاهد قائلة: «بعتبر هنا أختي، وأخواتها أخواتي لأن فعلًا بابا كان بيحبهم جدًا، وأي حد بابا كان بيحبه أنا بحبه، والأسبوع الماضي كنا سهرانين عندهم لحد بعد الفجر، وكانت هنا موجودة، وكنا قاعدين وأحمد مكي قاعد يكلمنا فيديو كول، وأحنا عيلة بعيد عن أي كلام مفيش غِيرة، أنا لاين، وهنا لاين تاني خالص، ودايمًا أي حاجة بتعملها أنا ببارك لها، وهي أي حاجة أنا بعملها هي بتبارك لي، وعلى طول مع بعض، وبنقعد مع بعض نفتكر بابا، ولازم نقرأ له الفاتحة، وأحنا قاعدين مع بعض متجمعين».
وعن أعمالها التمثيلية الجديدة قالت إيمي خلال لقاء في برنامج “عيش سعيد”: “هو لسه مفيش تحضير لحاجة في رمضان بس في مسرح، لأني بعشق المسرح جدًا، مع المنتج الكبير أحمد الإبياري، أنا مش عارفة هيقول إيه بعد التصريح ده ربنا يستر، حاجة برضو قريب إن شاء الله وهتبقى حاجة على مستوى كبير جدًا وحاجة فيها شغل كتير”.
