أحمد فؤاد سليم: الرئيس السيسي رجل مؤمن وبيخاف من ربنا.. وأعتبره ابني البكري الناصح

الفنان أحمد فؤاد سليم

تحدث الفنان أحمد فؤاد سليم عن فخره واعتزازه بالرئيس عبد الفتاح السيسي وبالإنجازات التي قدمها في مصر.

وقال أحمد فؤاد سليم في تصريحات إذاعية: مقتنع بجميع الإنجازات التي قدمها الرئيس السيسي وأتبناه، وأنا راجل كبير عجوز وبعتبره ابني البكري الناصح الشاطر وهو رجل حكيم وبيحسبها كتير ونأى بمصر خلال فترة 10 سنوات من الدخول في مشاكل عويصة لأن طول الوقت بيتعمل لينا فخاخ علشان نتورط.

وأضاف أحمد فؤاد سليم: السيسي كان بيحلم قبل كورونا أن مصر هتستريح وهتكون كويسة، ومن أول لحظة كان عنده إحساس عميق أن مصر دولة كبيرة وعظيمة والمفروض تكون كويسة، ولما بص للملفات لقاها خربانة وبايظة والصرف الصحي والمياه والطرق زحمة جدا، وفكر يبدأ بالأولويات وكل الملفات كانت أولويات ولذلك فتح كل الملفات ولكن كان فيه ضغط على المواطن البسيط ولكنه عمل مشاريع بتعيد للإنسان كرامته. 

أحمد فؤاد سليم: السيسي رجل شغيل وبناء

وتابع: الرئيس السيسي رجل مؤمن وبيخاف من ربنا وشغيل وبناء، ومش بينام، وعودنا إننا نصحى الصبح بدري وأن كل واحد يدور على مصلحته، لأننا كنا كمجتمع بندور على اللي يساعدنا لكن هو عودنا أن كل واحد يعتمد على نفسه لأن الحياة محتاجة جدية وفهم للواقع وأن يكون عندنا ضمير.

تحدث الفنان أحمد فؤاد سليم عن أهمية المسرح ومدى افتقاده له خلال السنوات الأخيرة، وذلك على هامش ندوة توقيع كتابه التي أقيمت اليوم بدار الأوبرا المصرية بحضور الفنان محمد رياض ومجموعة من الفنانين.

وتحدث أحمد فؤاد سليم عن أهمية المسرح قائلًا: المسرح معمل باخد فيه خبرات، ولما تشتغل سينما وتليفزيون طول الوقت الطاقة بتقل غصب عنك، لكن المسرح بيديك طاقة من خلال جمهوره، والمسرح قيمته الحقيقية في الناس، وكل يوم في تطور وبتشيل الشخصية معاك كل يوم، مرة ممثل أحرجني على المسرح وأنا سكت ثانية وجاوبت إجابة مفاجأة وخدت فيها سوكسيه، وبعدين حاولت أعملها تاني مكنتش بتضحك، والفكرة كلها في العفوية ولأن الناس عاشت معايا نفس المحنة أن ليه السؤال ده؟

وأضاف أحمد فؤاد سليم: أنا بحب المسرح وبعمل معايشة حقيقية وجوايا أنا بلعب، وأنا بتعذب لأني مبشتغلش مسرح، يعني مفيش نصوص ومش عارف في إيه.. القضية مش قضية مخرجين.. المخرجين عايزين يشتغلوا.

كما تطرق أحمد فؤاد سليم للحديث عن الفنانة الراحلة أمينة رزق، وروى موقف جمعه بها خلال تقديمها أحد المسرحيات قائلا: أفتكر واقعة حصلت في المسرح زمان، مع الفنانة أمينة رزق لما حست أن جورج أبيض داخل عليها يموتها بجد في المسرحية وطلعت تجري في الشارع وهو طلع يجري وراها وده جنان بجد، والعقل لابد من وجوده.

آخر أعمال أحمد فؤاد سليم

يذكر أن أحمد فؤاد سليم شارك في فيلم العنكبوت وضم الفيلم العديد من الفنانين، منهم: منى زكي، أحمد السقا، ريم مصطفى، ظافر العابدين، يسرا اللوزي، محمد لطفي، آسر ياسين، محمد ممدوح، زكي فطين عبد الوهاب، أكرم الشرقاوي، محمود غريب، والفيلم من تأليف محمد ناير، وتحت قيادة المخرج أحمد نادر جلال.