كان فيه غيرة بين الفنانات بـ جعفر العمدة وبعتبر نجاحي في المسلسل لبنات جيلي.. أبرز تصريحات هالة صدقي مع منى الشاذلي

الفنانة هالة صدقي

حلت الفنانة هالة صدقي، ضيفة على الإعلامية منى الشاذلي، وتحدثت خلال اللقاء عن دور صفصف، الذي قدمته في مسلسل جعفر العمدة، والذي عرض في موسم رمضان الماضي، حيث حقق العمل والدور نجاحا جماهيريا كبيرا، وكشفت هالة كواليس المسلسل التي كانت مليئة بالمرح. 

أبرز تصريحات هالة صدقي

ويستعرض الأجواء أبرز تصريحات هالة صدقي خلال الحلقة على النحو التالي:-

-أنا مخضوضة من نجاح جعفر العمدة وردود الفعل على السوشيال ميديا كبيرة والكلام الحلو اللي جالي قلقني.

ـ لو كنت أصغر 20 سنة كنت هختار دور وداد.

-نجاح جعفر العمدة بسبب محمد سامي.

-فتحت مطعم علشان احتفظ بنفس المستوى الفني.

-كواليس تصوير مسلسل جعفر العمدة كان فيها غيرة بسيطة ما بين الـ5 فنانات.

-دايما كنت عايزة أعرف ليه الممثلين بيبقوا في أحسن حالاتهم مع محمد سامي وكان لغز بالنسبة ليا.

-محمد سامي قالي عايزك في شخصية مش شايف حد تاني فيها، وأكيد لما أجيب هالة صدقي مش هضحى بتاريخها.

-محمد سامي قدر يزيح قشرة كانت موجودة واتشالت وظهرت هالة صدقي تاني. 

-أنا بعتبر إن نجاحي في المسلسل ده هو نجاح لبنات جيلي لأن دلوقتي محدش مهتم بينا وبيحاولوا ينزلونا درجة تانية.

-كل الأدوار اللي هتجيلي بعد كده هتكون زي دور صفصف، زي لما عملت أرابيسك جالي الأدوار باسم الشخصية.

-خايفة من نجاحي في جعفر العمدة ومش عارفة هعمل إيه بعده.

-في تشابه كبير بيني وبين صفصف.. مش بعرف أزوق الكلام.

-أنا دمي خفيف أكتر من صفصف ومعظم إيفيهاتها كان كاتبها محمد سامي.

-نصحت الفنانات اللي معايا إن الدور أهم من الاسم على التتر لأنه بيتشال عشان الإعلانات ودورك هو اللي هيبقى.

-قولتلهم مصر كلها هتتكلم على عبايات صفصف ولازم نهتم بيها.

-جالي مكالمة من كاتب مهم قالي معرفتش أكتب إيه بسبب انبهاري بالدور، وبعد ما قفل عيطت في نص حفلة كنت فيها.

-منة فضالي كانت ميتة من الضحك في مشهد الدجالة، وسامي زعق عشان الشباب في البلاتوه يسكتوا.

-عمري ما أحط جلسرين واتحدى أي مخلوق يقول إن الدموع في أي لقطة في حياتي غير حقيقية.

-مش هشتغل عشان الفلوس، وضيعت قبل كدة اللي ورايا واللي قدامي في مشروع غير التمثيل.

-إيمان العاصي كانت بتتخض مني في المشاهد لما كنت بشتمها علشان مكنتش تعرفني.

هالة صدقي: كل الأدوار اللي هتجيلي هتكون زي دور صفصف

واختتمت هالة صدقي: أنا بعتبر إن نجاحي في المسلسل ده هو نجاح لبنات جيلي كله، هما دلوقتي محدش مهتم بينا، وبيحاول ينزلونا درجة ثانية وميستغلوش خبراتنا وبيستسهلوا، وكل الأدوار اللي هتجيلي بعد كده هتكون زي دور صفصف، ولما عملت أرابيسك، جالي الأدوار باسم الشخصية، أنا من حبي وخوفي على شخصية رفضت الأدوار، وقفلت على السكة ديه خالص، وبعدت أوي عن الشعبي.

وقال محمد سامي خلال تصريحات تليفزيونية: هالة صدقي أستاذتي الموهوبة الخلوقة اللي كانت لمانا كلنا في حضنها، وهي العمود الفقري للمسلسل، كان معانا خبرة وأخلاق وذوق، وبشكرها إنها يوم ما قولتلها تعمل دور أم لناس كبيرة سنا وافقت وقالت أنا ممثلة.

وتابع: هي ست جميلة وخفيفة الظل ويا بختي إن يتحط في تاريخي إني اشتغلت معاها، ومن حق الممثلين أصحاب القدرات دي إنهم يتعاملوا مع ناس تقدر تطلع القدرات دي منهم.

وضم مسلسل جعفر العمدة عددا كبيرا من النجوم أبرزهم، محمد رمضان، مي كساب، إيمان العاصي، منة فضالي، زينة، هالة صدقي، محمد فهيم، وعددا آخر من الفنانين، والمسلسل من تأليف مهاب طارق ومحمد سامي وإخراج محمد سامي