سما المصري: انا إنسانة بسيطة جدا وبشتري لبسي من الوكالة ونفسي الناس تديني فرصة تانية

الفنانة سما المصري

قالت الفنانة سما المصري: “بعتذر لنفسي إني عملت فيديوهات خارجة وضايقت الناس وما راعتش اننا عايشين في مجتمع شرقي له عادات وتقاليد”.

شخصية سما المصري

وتابعت خلال لقائها ببرنامج “قعدة ستات” الذي تقدمه الإعلامية مروة صبري بقناة “اليوم”: “أنا إنسانة بسيطة جدا وبشتري لبسي من الوكالة، ونفسي الناس تديني فرصة تانية”.

فيلر سما المصري

ولفتت: “خرجت من السجن وهروح أعمل فيلر، أنا جسمي امتلأ شوية في السجن ولما كنت في سجن القناطر كانت القضايا كتير وتعبانة أوي وبقيت رفيعة أوى إنما لما اتنقلنا لمركز الاصلاح والتأهيل في العاشر كنا بنخرج نلعب كورة وفيه تريض ويجيلنا زيارات حقوق إنسان كتير”.

جمهور سما المصري

وأشارت سما المصري: “أنا بطبعي أصلًا بتكسف وعلى طبيعتي، أنا خسرت جمهور جديد بسبب الفيديوهات بس أنا ما كنتش شايفة الناس دي وكنت شايفة الفانز والمعجبين بالتصوير والفيديوهات ولو اتعرض عليَّ أطلع على التيك توك بشكل الفيديوهات القديم وبمبلغ كبير جدًّا هرفض والشركة اللي هتتعاقد معايا مش هي اللي هتتحبس مكاني”.

مشروع سما المصري بعد الخروج من السجن

وأكدت: “بعد ما خرجت من السجن نفسي أفتح محل كشري، وأنا بحب الكشري أوي ونفسي أنا أقف أبيع بنفسي”.

ندم سما المصري

وأكملت: “بسأل نفسي دلوقتِ إزاي كنت بعمل الفيديوهات دي وإزاي كنت بقدر أصور وأنشر كدا، أنا عارفة إننا مجتمع شرقي وله عاداته وتقاليده فيه حاجات عملتها كانت تعدي ولكن فيه حاجات كانت أوفر وبتخض لما بشوفها فبمسحها، مسحت فيديوهات كتير ليَّ على يوتيوب وفيس بوك وإنستجرام، وأخدت قرار إنه مستحيل أعمل فيديوهات زي دي لإنها ما كانتش حلوة وما كانتش في حاجة إني أعملها”.

ولفتت سما المصري: “أنا ما أعرفش إزاي وليه كنت بعمل الفيديوهات الخادشة للحياء وما كنتش وقتها حاسه إنها أوفر، وكنت بقول لربنا بالليل مش عايزة أعمل الحاجات دي تاني بس كنت أقوم الصبح أعملها، أنا مش قادرة أمسك نفسي من العياط بس ندمانة على الفيديوهات الصعبة اللي عملتها ومش عايزة تشوفني بالفيديوهات المستفزة والمثيرة”.