بدرية طلبة عن قائمة الطلبات المدرسية: كان آخرنا قلم وبراية.. دلوقتي الطفل شايل عزاله ورايح بيت عروسته

الفنانة بدرية طلبة

علقت الفنانة بدرية طلبة، على قائمة الطلبات الكبيرة التي تطلبها معظم المدارس حاليًا، مشيرةً إلى أنها تنتمي لجيل كانت طلباته المدرسية قليلة للغاية.

ونشرت بدرية طلبة فيديو ساخرا تمزح فيه، عبر حسابها الرسمي بموقع انستجرام، وقالت: إيه موضوع السبلايز اللي طالعين بيه اليومين دول ده، إحنا كان آخرنا قلم رصاص وبراية وجومة، وأمي كات بتشاركني في البراية بتاعتي بتبري بيها قلم الحواجب والكحل بتاعها.

وتابعت بدرية: لما جم يكبرونا قالوا يزودولنا قلم جاف وقلم حبر، وبعدين خلوا الجومة بريحة فبدل ما نمسح بيها بقينا بناكلها ونمسح بالجومة بتاعة القلم الرصاص، بعدين زودولنا في ثانوي برجل ومنقلة، دلوقتي بيقولوا ده لطفل قد كدة لسة مطلعش من البيضة، ويقولك سبلايز وأم الطفل ياعيني بتوصله المدرسة كأنها شايلة عزاله ورايحاله بيت العروسة توصله.

أثارت الفنانة بدرية طلبة حالة من الجدل، بعد توجيهها رسالة غامضة تهاجم فيها أحد الأشخاص، التي تجاهلت ذكر اسمه، حيث أشارت إلى أنها ملكة الكوميديا في مصر والوطن العربي، هذا بجانب تقديمها نموذجًا للسيدة المصرية البسيطة، وتنوعها في الأعمال التي تجعل لها شعبية كبيرة، لتقديمها شكل واقعي للمرأة المصرية.

وكتبت بدرية طلبة منشورًا، عبر حسابها الرسمي بموقع التواصل الاجتماعي فيس بوك، قالت فيه: اللي بيته من زجاج ميحدفش الناس بالطوب، اللي عايزة تحلي نفسها مش هتطلع تتكلم على سنها، وتحكي على أحفادها، وتعمل أدوار زي اللي أنا بعملها، اللي أحافظ بيها على شكلي وعلى نفسي، ودا الست العادية بقت تعملوا.

وتابعت بدرية طلبة: والشعبية اللي مش عجباك شرف ليا أني معجبش واحد زيك، شوف بقا حاجة تانية قولها، علشان أنا لسة زي ما أنا، العالم كله بيحبني، ومحدش أخد ولا هيقدر ياخد مكاني.. بدرية طلبة ملكة الكوميديا في مصر والوطن العربي غصب عنك.

أعمال بدرية طلبة

جدير بالذكر أن الفنانة بدرية طلبة، شاركت في الموسم الرمضاني بـ عملين هما مسلسل الأجهر، مع الفنان عمرو سعد، درة، محمد التاجي، وآخرون، ومسلسل رمضان كريم، مع الفنان سيد رجب، كريم عفيفي، ومجموعة آخرى من نجوم الفن، وكلاهما حققت فيهم نجاحًا كبيرًا، هذا بجانب مشاركتها في مسلسل أسيل، بطولة ثراء جبيل، وباسل الزارو. والذي عرض قبل الموسم الرمضاني.