نورين شحاتة: لو الزوجة دورها تغسل وتنضف الراجل يجيب شغالة أحسن.. والست شريكة حياة مش عاملة
كتبت: ياسمين ياسر

الإعلامية نورين شحاتة
تحدثت الإعلامية نورين شحاتة عن دور الزوجة مع زوجها في الحياة بشكل عام، وعن مشاركتها ومساهمتها في الحياة، مشيرة إلى أن الزوجة شريكة حياة مش عاملة.
وناقشت نورين شحاتة خلال برنامج البيه والهانم موضوع دور الزوجة ومشاركتها في مصروف المنزل، قائلة: يعني إيه الست لازمتها إيه في البيت لو جبت شغاله هتبقى محتاج تتجوز مفيش إمكانية تجيب شغالة بس فيه إمكانية تتجوز ؟!
وعن دور الزوجة، قالت نورين: الزوجة دورها معاك هي شريكة حياة في الآراء والسند.. الزوجة بتسندك في الوقت الصعب أنت عايز شريكة حياة مش عاملة، ويعني إيه أصلا مطيعة يعني إيه الست تقول حاضر ونعم بدون نقاش.. ما تجيبلك شغاله لو الزوجة دورها تغسل وتنضف.
ناقشت الإعلامية نورين شحاتة، قضية استقلال المرأة عن منزلها أسرتها والانتقال للعيش بمفردها، وذلك خلال ثاني حلقات برنامجها البيه والهانم، الذي تقدمه مع الإعلامي ممدوح الشناوي، عبر شاشة قناة القاهرة والناس، مؤكدة أن الفتاة هي الرقيب على شخصها وليس الأفراد من حولها.
وقالت نورين شحاتة، خلال مقدمة الحلقة: أنا شايفة أن أي ست لازم تكون مستقلة مفيش كلام، تكون مستقلة رأيًا وماديًا، هي نص المجتمع، وفي بعض الأسباب ممكن البنت تسيب بيت أهلها زي إنها تعيش في بلد تانية أو تدرس برا، لكن الست نص المجتمع، الراجل راجل والست ست ووجدوا في الحياة عشان يكملوا بعض، مفيش حد ممكن يخاف عليكي ولا يحتضنك أكتر من الأب والأم.
وأضافت نورين شحاتة: الست أو البنت مش محتاجة تعيش في بيت أهلها عشان يكون عندها أخلاق، ولكن الواحد رقيب على نفسه.
برنامج البيه والهانم
برنامج البيه والهانم، والتي تقدمه الإعلامية نورين شحاتة والإعلامي ممدوح الشناوي، يعد برنامجًا اجتماعيًا يناقش كل ما يخص المرأة والرجل، وخلال الحلقات سيتم استضافة مجموعة من نجوم الفن على مدار الحلقات، والبرنامج من إنتاج شركة ريكورد ميديا، ويعرض من الأحد حتى الأربعاء في الساعة السادسة مساء.