إيناس الدغيدي: الدراما تراجعت وفيه مشكلات بالكتابة.. والمنتجين بيستغلوا دورة رأس المال

المخرجة إيناس الدغيدي

عبرت المخرجة إيناس الدغيدي عن سعادتها بحضور الدورة الثانية لمهرجان القاهرة للدراما والتي أقيمت أمس بمدينة العلمين.

وقالت إيناس الدغيدي في تصريحات صحفية: الدورة الثانية من مهرجان القاهرة للدراما ليست استثنائية ولكنها هتفضل على طول، والجو هنا جميل وحلو والصيف حلو والناس حلوة وخلينا هنا على طول وبلاش نرجع القاهرة تاني.

وأضافت إيناس الدغيدي: المهرجان بيدي الجوائز للناس اللي تستحقها وبيخلي فيه منافسة كبيرة، وبيشجع المنتجين، وكنت أتمنى أن جوائز الإنتاج يكون فيها فلوس زي السينما علشان يشجعوا المنتجين يعملوا دراما جيدة خاصة أن الدراما فيها مشكلات في الكتابة وتراجعت.

إيناس الدغيدي تكشف رأيها في الدراما التلفزيونية 

وتابعت إيناس الدغيدي: الدراما فيها مشكلة في الكتابة، ولكن الممثلين والمخرجين كويسين، والدراما تراجعت بسبب دورة رأس المال لأن المنتجين بيستغلوها وبيخلوها قصيرة ومش عاوزين يشتغلوا من زمان وبيرستقوا الموضوع قبل رمضان بشهرين ويزنقوا المخرج والممثلين وبالتالي الكواليتي مش كويس.

إيناس الدغيدي تكشف سبب ابتعادها عن السينما 

على جانب آخر، سبق أن تحدثت إيناس الدغيدي، عن رغبتها في العودة إلى السينما، بعد غياب دام لسنوات، حيث كان آخر أعمالها في السينما عام 2009 من خلال فيلم مجنون اميرة مشددة على أنها لن تعود إلا بشروطها.

وأضافت إيناس الدغيدي في لقاء لها في إذاعة أغاني اللبنانية: أنا مبتعدة عن السينما، وأنا كان ليا بصمة، ونفسي أشتغل تاني، ومتوقفتش ولكن نفسي أعمل السينما اللي أنا بحبها، مش اللي الناس بتحبها، وبحب السينما اللي فيها موضوعات جريئة اللي بتناقش العلاقة بين الرجل والمرأة، والمشاكلات الاجتماعية المهمة اللى هيا سبب مشاكلنا كلها.

إيناس الدغيدي بشأن تصريحاتها الجريئة: أنا صادقة ومبزعلش

كما علقت المخرجة إيناس الدغيدي على سوء فهم البعض لتصريحاتها الجريئة، مؤكدة أنها صادقة في تصريحاتها، ويتفق معها الكثير من الأشخاص ولكن لا يصرحون بذلك، مضيفة: أنا مبزعلش من اللي بيفهم تصريحاتي بطريقة خطأ، وأنا أكتر واحدة كنت جريئة في أفكار المجتمع العادية اللي إحنا عايشنها.

وأردفت قائلة: أنا دخلت في مناطق محظورة كتيرة، وصرحت بمواقف كتير شايفه أنها في صالح المجتمع مش ضد المجتمع لأن الناس بتبص بنظرة قصيرة أوي.

إيناس الدغيدي على تصريحات مصطفى هريدي: أنا برد على حاجات كبيرة بس

وتحدثت إيناس الدغيدي عن تصريحات مصطفى هريدي، والذي هاجمها فيها بشأن تصريحها عنه بشرب المواد المخدرة، قائلة: أنا مبردش على الحاجات الصغيرة دي، أنا برد على حاجات كبيرة، ومشاكل الشغل بتعدي وبتروح وياما اتخانقنا مع ناس مهمين أكتر بكتير من مصطفى ومحدش اتكلم، بس في ناس بتحب تعمل شهرتها على الكلام.

وكشفت إيناس الدغيدي اختلاف الوسط الفني حاليًا عن الماضي، قائلة: الوسط الفني اتغير عن الأيام دي كتير، زمان كان فيه حميمة أكثر بينا وطريقة التعامل في الأفلام والحب اللي كان موجوده مكنش مادي، انهاردة المادة لعبت دور كبير والناس كلها بتشتغل عشان الفلوس، ومحدش بقى عارف يعمل اسمه يعني ممكن واحد يعمل اسمه بفضيحة، زمان كنا بنعمل اسمائنا عادي.