عبد الباسط حمودة يهاجم محمد الحلو بعد عمار يا سعودية: إحنا اللي خلينا محمد عبده وطلال مداح نجوم

الفنان عبد الباسط حمودة

هاجم الفنان عبد الباسط حمودة، المطرب محمد الحلو، بعد استبدال الأخير لكلمات أغنية عمار يا اسكندرية، إلى عمار يا سعودية، أثناء غنائه في إحدى الحفلات بالمملكة، وهو ما عرضه للكثير من الانتقادات. 

وعلق عبد الباسط حمودة على هذا الأمر، الذي قال فيه: مصر أم الدنيا وأم الفن، إحنا اللي خلينا محمد عبده بقا نجم، وطلال المداح الله يرحمه ووردة بقوا نجوم من مصر، إحنا بلد الفن والجمال وأي واحد بيجي هنا بينجح، حسين الجسمي بيحب مصر، ووائل جسار قال أنا بحترم مصر، صابر الرباعي مصر اللي عملته.

عبد الباسط حمدوة يهاجم محمد الحلو

وأضاف عبد الباسط حمودة: أحييت حفلات في السعودية، قبل ما أي حاجة بقول مصر قبل ما أقول أي حاجة، بقول أنا بحب جمهورية مصر العربية، وبعدها بقول السعودية، أو أي بلد تانية، ولو الفنان مش شاطر ونجم السعودية مش هتاخدوا، مصر هي اللي بتحيي الحفلات، ولا كلمة تتقال إحنا النجوم هنا، وأي واحد نجم طلع من هنا.

وأثار الفنان محمد الحلو حالة كبيرة من الجدل، بعد استبداله كلمات عمار يا اسكندرية، إلى عمار يا سعودية، وهو ما جعله يقع في مرمى الانتقادات، وأشار البعض إلى أنه فضل السعودية عن وطنه، باستبداله كلمات هذه الاغنية من أجل كسب رضاء السعودية، وهو الأمر الذي جعله يتعرض لهجومًا عنيفًا، وانتقادات لاذعة من الجمهور.

وقال محمد الحلو على هامش المؤتمر الصحفي الذي أقيم لحفل ليلة الطرب الأصيل: بصراحة قولت ممكن يتعاد الحفل في موسم الرياض إنما فوجئت على السوشيال ميديا بصفحة الوزير وقال إننا مكتفناش بصوته ونعمله حفلة يوم 1 سبتمبر، استغرب والله وقولت ممكن بقى عايز يهديني ويحيني.

وأضاف: عاوز أقول صراحة من أول ما نزلت من الطيارة وبياخدونا على العربيات وبعدين بنمشي، مش بنمسك شنطة وفيه تنظيم هايل زائد لما الناس قابلوني كانوا مفاجأة ولما غنيت ليالي الحلمية لقيت صريخ، بقى قلبي فرحان، زائد الكرم الكبير اللي أنا شوفته فأنا ماشي من هنا في دماغي هقدم إيه؟ فقولت مفيش غير صوتي أقدم بيه غنوة يبقى هدية من هدايا اللي ادوهاني الجمهور والمملكة.

وأردف محمد الحلو: كلمت مصطفى كامل ومصطفى بيفهم في الحاجات دي وهو شاف الحفلة وعملي الكلام ولحنه وادينا الأغنية للموزع أمير عبد المجيد هو كان عنده شغل ولكن أنا حبيب عمره ودي السعودية وهو كمان سعودي مصري، فعملناها وطلعت بالشكل ده الحمد لله، بعد ما اتناقشنا في شوية تفاصيل ومعظم الأغنية طلعت من أول مرة.

وتابع محمد الحلو: لا أنا متفاجئتش أنا اتخضيت، مكنتش متوقع كده أبدًا ودي أول مرة تحصل، مبقيتش عارف اعمل إيه وباصص لأمير مش عارف هو كمان يعمل إيه وكان شرف كبير جدًا على رأسي إنه يكلمني على المسرح أبو ناصر قدام العالم العربي وهو وزير، أنا آه كبير في السن إنما ده شرف أكبر مني.

أعمال محمد الحلو الجديدة 

أما عن أعماله الجديدة خلال الفترة المقبلة، اختتم محمد الحلو حديثه قائلًا: لسه بقى وأنا هسكت، مش هسكت هيبقى فيه حاجة حلوة وعلى قد حبي لأبو ناصر ولشعب المملكة، وبقولهم في يومهم الوطني كل سنة وأنتم طيبين وأنتم في أجمل عصر للمملكة وخلو بالكو وحافظوا على اللي انتو فيه؛ لأن انتو بتطلعوا وحافظوا على بلدكم وإن شاء الله هتبقى دولة من الدول الكبرى في العالم بإذن الله وبإذن الله معاكو مصر.