إلهام شاهين: ندمت على تقديم فيلم موت سميرة لأنه بيسيء لبليغ حمدي.. ونفسي أقدم عمل عن حتشبسوت

الفنانة إلهام شاهين

كشفت الفنانة إلهام شاهين عن الفيلم الذي ندمت على تقديمه، والسبب وراء ندمها، وذلك خلال لقاء لها ببرنامج الراديو بيضحك مع الإعلامية فاطمة مصطفى عبر محطة الراديو 9090.

وقالت إلهام شاهين في تصريحاتها: مش راضية 100% عن كل ما قدمته، بدايتي كانت قوية أوي، أمهات في المنفى، العار، لا تسألني من أنا، البريء، دول أول 4 أفلام ومن أهم أفلام السينما المصرية، وبعدين خدت البطولة في الهلفوت، بس جات فترة انتشار كتير وبيجيلي أفلام كتير ودي ممكن يكون فيها إخفاقات ولكن حتى الاختيار الغلط أنا بتعلم منه وبعرف أن دا كان غلط وأن أنا إمكانياتي أكبر من دا ولازم اتوجد في حاجة أهم.

وتابعت: وأنا ندمت على فيلم مش لأنه تافه، ندمت عشان رسالة الفيلم بكرهها أوي، فيلم اسمه موت سميرة، بزعل من نفسي جدا، أنا بحب الفن وأهل الفن أوي وبدافع عنهم بكل ما فيا من قوة، والفيلم دا أنا كنت صغيرة وخبرتي صغيرة بيسيء لفنان كبير جدا، وهو الملحن أستاذ بليغ حمدي، والفيلم دا كان إساءة ليه.

إلهام شاهين: معرفتش أقدم شخصية حتشبسوت بسبب التكاليف الإنتاجية

وفي اللقاء ذاته، تحدثت إلهام شاهين عن حلمها بتقديم شخصية الملكة حتشبسوت في عمل سينمائي، فقالت: أنا بحترم أوي تاريخ المرأة المصرية لأنه أقوى تاريخ للمرأة في الكون مش في مصر، يعني أول أمرأة تحكم في التاريخ الإنساني كله كانت الملكة حتشبسوت، كانوا بيندهوا عليها بصيغة الرجل “مولاي” مش “مولاتي”، لأنه مكنش معتاد أن ست تحكم، وفي فترتها مصر كانت في عظمتها، الزراعة تقدمت جدا، فنون الحرب تقدمت جدا.

وتابعت: وحصل رواج لمصر كبير جدا في عهدها، وشجرة الدر كان مكتوب مسلسل وللأسف متعملش، جابهولي أستاذ يسري الجندي الكاتب وقالوا الأعمال التاريخية بتتكلف كتير أوي معرفناش نعمله، زي فيلم حتشبسوت اتكتب وروحت بيه لأستاذ يوسف شاهين وقالوا مكلف جدا، وكان نفسي أعمل فيلم تاريخي لشخصية نسائية مهمة في التاريخ، ومعرفتش أحقق دا بسبب التكاليف الإنتاجية.