شاكوش يهاجم العسيلي بعد تصريحاته: معرفش ليك أغاني ومينفعش يطلع من بوقي لفظ يضايق جمهوري
كتبت: ياسمين ياسر
مؤدي المهرجانات حسن شاكوش
هاجم مؤدي المهرجانات حسن شاكوش، تصريحات المطرب محمود العسيلي؛ الذي أبدى خلالها تعجبه من اعتلاء مطرب غير مشهور صدارة الأعلى استماعا بالوطن العربي، حسب تصريحات تلفزيونية.
ورد حسن شاكوش خلال لايف عبر حسابه الشخصي بموقع إنستجرام، قائلا: مينفعش نبقى في وش بعض نتكلم بأسلوب، وفي الضهر نتكلم بشكل تاني وبطريقة تانية، أنا مبحبش البني آدم اللى كده، محمود العسيلي جالى كذا حفلة وبنزل الاستيدج وأروح أسلم عليه ده ذوقيًا، وده اللى اتربينا عليه.
وتابع حسن شاكوش: يعني أنت عرفت اسم عصام صاصا ومش عارف أغانيه، مينفعش يكون عصام صاصا تريند وأطلع أقول معرفش بيغني إيه.
وأوضح شاكوش: أقسم بالله مش عشان حاجة أنا مش حافظ أغاني لمحمود العسيلي ولا أعرفها، إحنا الحمدلله والشكر لله مسمعين وموجودين في الوطن العربي، اللى هيحترمنا هنشيله فوق دماغنا، واللى مش هيتحترمنا مش هنحترمه، مينفعش يطلع من بوقي لفظ يضايق أي حد وأنا بيسمعني عائلات وأطفال.
واختتم شاكوش: بتقول الراب كمان هينتهي، طب لما الشعبي والراب هينام مين هيبقى موجود؟ أمال مين هيرقص الناس، إحنا لازم نحترم بعضينا ونقدر بعضينا ونخاف على مشاعر بعض، أنا راجل بغني وفي سوق ووسط النجوم فلازم أكون عارف ده بيغني ايه وبيعمل إيه، عيب إنك تقول عصام صاصا ومش عارف بيغني إيه عصام صاصا؟ بيغني هندي؟ ربنا يهدي الجميع.
حسن شاكوش: كنا موقفين شغل الفترة اللي فاتت بسبب أحداث غزة
وعلى صعيد أخر، أعلن مطرب المهرجانات الشعبية حسن شاكوش منذ قليل طرح أغنيته الجديدة أصحاب ملاعين وذلك عبر حسابه الرسمي بموقع تبادل الصور والفيديوهات انستجرام، كاشفا عن مقطع من الأغنية للإثارة والتشويق ما جعله يتعرض لهجوم مروع على السوشيال ميديا لعدم تناسب الأغنية مع الأوضاع الحالية التي تتعرض فيها أهالي غزة للقتل والإبادة الجماعية على يد الكيان الصهيوني.
وخرج حسن شاكوش في لايف عبر حسابه الرسمي بموقع تبادل الصور الفيديوهات انستجرام ليوضح موقفه للجمهور فقال: كنا موقفين الفترة اللي فاتت بسبب أحداث غزة، وقولنا مينفعش نشتغل وأخواتنا بيموتوا وننزل أغاني ميصحش، بقالنا كتير جدًا مابنزلش، ولما عملت دعاية لأغنية صحاب ملاعين حصل حوار فلسطين، ولقينا الموضوع بيطول وبيتحول من سيئ لأسوأ، فقررنا تأجيلها، ولكن هنزلها كمان كام يوم وهتبقى أغنية زي وداع يا دنيا وداع وشمس المجرة.
