فتوح أحمد: أنا صعيدي متربي على إني ملك والخدم حواليا.. ومراتي كانت المفروض تتطلق 30 مرة

الفنان فتوح أحمد

تحدث الفنان فتوح أحمد، عن حياته الشخصية والتعامل مع زوجته، مازحًا: مراتي كانت المفروض تتطلق 30 مرة من اللي بعمله فيها.

وقال فتوح أحمد خلال لقائه في برنامج الستات: مراتي كانت المفروض تتطلق 30 مرة من اللي بعمله فيها.. أنا وحش فعلا وعصبي جدا لدرجة وحشة وأنا صعيدي ومتربي على إني ملك والخدم حواليا.

وأردف فتوح أحمد: مراتي تعبت معايا جدا عشان كده كنت عاوز أخلف عشان مسبهاش لوحدها، لكن ربنا مقسملناش.. والحقيقة أنا كنت مزعج وعصبي بسبب ظروف الشغل وبخرج وبشتغل مسرح وهي قاعدة فكنت بدعي تيجي حاجة ليها تشغلها، وحاولت تعمل مشاريع لكن فشلت فيها لكن مبسوط إنها انشغلت فيها.

أعمال فتوح أحمد

ويعد مسلسل الأصلي، آخر أعمال فتوح أحمد، الذي عرض مؤخرًا، حيث ضم العمل كلا من ريهام عبد الغفور، إيناس كامل، إسلام جمال، إيهاب فهمى، تامر نبيل، أحمد الشامي، شاهيستا سعد، يوسف عثمان، سارة نور، جلا هشام، أشرف زكي، كريم عبد الخالق، أيمن الشيوي، أحمد والي، أحمد عبد الحميد، طه خليفة، محمد درويش، ولاء الشريف، أحمد كشك، ميدو ماهر وعدد آخر من الفنانين، والعمل من تأليف أمين جمال، وإخراج أحمد حسن.

كما شارك فتوح أحمد في الماراثون رمضان الماضي لعام 2023، بمسلسل جعفر العمدة، حيث ضم المسلسل مجموعة كبيرة من أبرز الفنانين ومنهم: محمد رمضان، هالة صدقي ومنة فضالي وزينة وإيمان العاصي ومي كساب وجوري بكر، أحمد داش، ومن إخراج وتأليف محمد سامي.

شائعات الموت

وعلق علي شائعات الموت التي تطول الفنانين بصفة دائمة، والتي طالته في وقت سابق، قائلا: “بجد ناس مزعجة .. وبستغرب لما يكون شيخ بدقن ويهاجم فنان علشان راح مهرجان في بلد شيعي ومش بيتكلم لما يروح مهرجان في اليونان مع انه بلد مش مسلم ..ده فن ملوش علاقة بالدين.. وبعدين يطلع شائعة اني توفيت بجد عيب .. زمان لما كنت بشوف شيخ بدقن كنت بقوم اقف احتراما لكن دلوقتي لما بشوف حد بدقن بخاف”.

خريج المعهد لقيط

وطالب “فتوح”، بضروروة توفير فرص عمل لشباب الخريجين من المعهد العالي للفنون المسرحية ومعهد السينما حتى لا تضيع اعمارهم في محاولة الظهور علي الشاشة، قائلا: “انا بعتبر خريج المعهد ده زي اللقيط اللي بيتحط علي باب جامع لو قابله شيخ هيبقى صالح ولو قابله حرامي هيبهدله .. خريج المعهد برضوا بيبقى ماشي ممكن يقابل مخرج يكتشفه وينقله ناقلة تانية وممكن لا”.

يذكر أن برنامج الستات، من تقديم الإعلامية مفيدة شيحة والإعلامية سهير جودة، ويذاع من السبت إلي الأربعاء في تمام الساعة الثالثة عصرا علي قناة النهار الفضائية، ويناقش هذا البرنامج قضايا ومشكلات المجتمع بالإضافة إلي فقرة خاصة بالطبخ.

ويعد هذا البرنامج هو التعاون الثاني بين الإعلامية مفيدة شيحة والإعلامية سهير جودة بعدما قدما سويا برنامج “الستات ميعرفوش يكدبوا” مع منى عبدالغني علي شاشة CBC.