حورية فرغلي عن تبنيها لطفل من فلسطين: “ما ينفعش أتبنى لأني مش متجوزة”

الفنانة حورية فرغلي

كشفت الفنانة حورية فرغلي إمكانية تبينها طفلًا من أبناء فلسطين في ظل الأزمة التي يمرون بها بسبب الحرب، وذلك بعد طرح أشرف زكي نقيب المهن التمثيلية فكرة تبني طفل من أبناء غزة على الفنانين، وذلك خلال مؤتمر التضامن مع فلسطين في مصر.

وقالت حورية فرغلي في لقاء مع برنامج إي تي بالعربي: ما ينفعش أتنبى لأني مش متجوزة، حاولت أتبنى قبل كده، وقالوا لي مش هينفع، لازم تكوني متجوزة، فكفلت طفلين وماتوا، وشلت الرحم من فترة وعمري في حياتي ما هيكون معايا أولاد وبعتبر كل الأطفال الصغيرين ولادي.

وأضافت حورية فرغلي موجهة رسالة إلى شعب فلسطين: قلبنا معاكم وبنفكر فيكم طول الوقت ومش بنتكلم غير عليكم وإن شاء الله ربنا هيعدي الأزمة دي على خير.

حورية فرغلي تعلن تبرعها بأرباح البازر الخاص بها لغزة 

في سياق متصل، كانت حورية فرغلي أعلنت تبرعها بأرباح البازار الخاص بها لأهل لغزة، ونشرت مقطع فيديو، عبر حسابها الرسمي بـ فيس بوك، معلقة: استنوني في بازار يوم 26 أكتوبر مع صديقتي، وكل أرباح البازار هتروح لأهل غزة.

وسبق أن نشرت حورية فرغلي تعبر فيه عن حزنها الشديد بسبب أحداث غزة الأليمة، قائلة: قلبي كله حزن وبيتقطع من اللي أنا بشوفه، وساعات مش بقدر أكملها بس لازم يكون فيه حل، وبدعي ربنا يفك كربهم وينصر أهلنا في فلسطين، الأطفال اللي بيموتوا مش ذنبهم حاجة.

وأضافت حورية فرغلي في الفيديو الذي نشرته مؤخرًا عبر حسابها بموقع انستجرام مستنكرة: معقولة الناس تروح ضحايا، هما ذنبهم إيه؟، يعني انتوا بتحاسبوا شعب بسبب فئة غلطت، ولازم يكون فيه بجد حرام اللي بيحصل ده وأنا بدعي ربنا إن الموضوع ده ينتهي.

علقت الفنانة حورية فرغلي على أزمة تعلق اسمها بمطرب المهرجانات حسن شاكوش وطليقته ريم طارق، وذلك بعدما ذكرت الأخيرة اسمها في أكثر من أمر يتعلق بأزمة طلاقها من شاكوش. 

ونشرت حورية فرغلي مقطع فيديو عبر حسابها الرسمي بموقع إنستجرام، علقت من خلاله على ذكر اسمها في أزمة حسن شاكوش وريم طارق، وقالت: مساء الخير، الحقيقة طالعة أتكلم في موضوع كان بقاله فترة ومضايقني وساكتة بس أنا قررت إني لما يحصلي حاجة زي دي أشهدكم عشان لو غلطانة انتوا تقولولي، أنا كنت ساكتة فترة طويلة جدا ومش برد عشان أنا أكبر بكتير من كدة بس الموضوع زاد عن حده.

وأضافت حورية فرغلي: وأنا من طبيعتي مش بطلع أتكلم وأرد بس من كتر ما الموضوع بقى أوفر مش قادرة عايزة أشهدكم، حتى مش حابة أقول الاسم بس هضطر أقول عشان كرامتي وعشان حقي المعنوي، الأستاذة ريم طارق طليقة حسن شاكوش اللي أنا معرفهاش خالص وعمري ما شوفتها إلا في فرحها على السوشيال ميديا، وفي برنامج بسمة وهبة، واتقال اسم حورية وتالت حرف ر والناس سابت كل الأسامي ومسكت في اسمي، ومع ذلك سكت ومتكلمتش إنما يجيلك الجرأة إنك تنزلي وتقولي إن الفنانة حورية فرغلي تكشف عن اسم الفتاة اللي كانت مع شاكوش لغاية هنا وستوب.

حورية فرغلي لطليقة حسن شاكوش: بتجيبي اسمي عشان تطلعي تريند

وأكملت حورية فرغلي: يعني انتي عايزة إيه بظبط، عايزة تجيبي اسم حورية فرغلي عشان تطلعي تريند، أنا أعرف منين البنت اللي كانت معاه، وأنا على فكرة مصورة اللي انتي منزلاه وممكن أرفع عليكي قضية تشهير، وبرضه بعد ما قولتي كدة أنا سكت ومش عايزة أتعدى الموضوع اللي أنا مليش علاقة بيه أصلا، لكن لما تطلعي تقولي أنا معتذرتش لحورية فرغلي.. حبيبتي أنا مطلبتش منك تعتذريلي، تعتذريلي على إيه؟ على الفيلم الهندي اللي انتي عاملاه وجايبة اسمي فيه؟.

وواصلت حورية فرغلي حديثها قائلة: هو أنا أعرفك يبنتي؟ أنا أكبر من كدة بكتير انتي بس مش واصلك، وإنك تغلطي فيا وأنا مليش علاقة بالموضوع وعمري ما بجيب سيرة حد وطول عمري في حالي ومش بحب القيل والقال والكلام في الحاجات الغريبة دي، فـ أنا إنسانة بطبيعتي بحب الهدوء وعايشة لوحدي لأني مبحبش الدوشة وعمري ما بغلط في حد وبحترم الناس كلها، وطالعة أرد عليكي وبشهّد الجمهور على اللي بقوله عشان الناس تقولي لو أنا غلطت في أي حاجة.

حورية فرغلي لـ طليقة حسن شاكوش: المرة الجاية هشتكيكي بالتشهير

واختتمت حورية فرغلي حديثها قائلةً: الحمد لله تاريخي بيشهد عليا إني مع نفسي وفي حالي ومش بتاعة مشاكل وكويسة جدا مع الوسط وبعتبرهم أهلي، وكمية الناس اللي اكتشفت إنها بتحبني وبتدعيلي ربنا يخليهم كلهم ليا يا رب، بس في حاجة عايزة أقولها إني بحترم الصغير قبل الكبير لأني اتربيت على كدة وفي بيت عيلة كبير وعلموني يعني إيه أخلاق وقيم، مش هقولك غير ربنا يهديكي لنفسك وتبطلي تجيبي في سيرتي، لأن بجد المرة الجاية أنا هشتكيكي بالتشهير بيا وصدقيني مش هتستحملي، ومش هتتخيلي هيحصل فيكي إيه، واسم حورية فرغلي متقوليهوش عشان تطلعي تريند. 

أزمة ريم طارق وحسن شاكوش 

وكانت ريم طارق طليقة حسن شاكوش علقت منذ فترة على الأزمات والخلافات التي نشبت بينهما، وذكرت إن شاكوش على علاقة بفتاة ثالث حرف من اسمها راء، وربط الجمهور بين حورية وعلاقتها بشاكوش.