محمود البزاوي: محمود السعدني صاحب فضل وحببني في العلام.. ومشهدي مع وحيد حامد فرق في مشواري

الفنان محمود البزاوي

أعرب الفنان محمود البزاوي عن حبه الكبير للكاتب الراحل محمود السعدني؛ إذ أشار إلى أنه تعلم من الراحل الكثير في حياته، وأن السعدني كان صاحب فضل عليه، كما أكد البزاوي أنه يحب أن يُرافق الكبار دائمًا، ليتعلم منهم مثل السعدني ووحيد حامد.

وقال البزاوي، في تصريحات تليفزيونية: محمود السعدني من أكتر الناس اللي أثروا فيا، حببني في العلام، السعدني محطة مهمة في حياتي، عشت معاه كتير.

وأردف البزاوي: أعرف عمي محمود السعدني من 1988، وبقرأ له من وأنا في ابتدائي، لكن رغم السنوات الكبيرة اللي عشتها معاه، لكن كلام له مكنش يتعد على الصوابع، لإني بتفرج عليه وبسمعله، وبعيش تجربته بالسمع وعارف قيمته من يومه، عارف إني همشي في ضل التاريخ.

وأضاف البزاوي: حابب أقوله شكرًا، لإني لما شوفته والتقيت بيه، طمعت في إني أمشي في كل الطرق مش طريق واحد، وحاليًا بشوفه في أكرم ابنه، هو له فضل عليا في حياتي ومستقبلي.

محمود البزاوي: مشهد عايز أبقى كافر مع وحيد حامد فرق في مشواري الفني

كما تحدث البزاوي عن موقف جمعه مع الراحل وحيد حامد، أثناء تصوير مشهده الشهير (عايز أبقى كافر) في مسلسل بدون ذكر أسماء، إذ قال: أنا بطمع إني أشتغل مع الناس اللي هستفيد منهم، أستاذ وحيد قالي هتعمل معايا مشهد والمسلسل بيتكتب، وافقت وعملت المشهد عن قناعة، ولقى إعجاب كبير من الجمهور.

وتحدث محمود البزاوي عن هذا الأمر في تصريحات تليفزيونية، قائلًا: أكتر حاجة بخاف منها المجهول، إحنا اتربينا عليها وموجودة فينا، يا بنتكلم في اللي فات يا في الموت، إنما مبنفكرش في اللحظة الحالية، إيمانّا بقى مرتبط بإننا نخاف من بكرة والموت والعذاب والعقاب، كل زمن له مشاكله ومصايبه، أهالينا ربونا على فكرة اعمل حساب بكرة ممكن تموت، هو الموت علينا حق، لكن احنا مش بنفكر في دلوقتي، بنفكر في يا زمان حصل كذا يا بكرة هنموت.. إحنا أجبن من إننا نواجه الحاضر.

كما أكد البزاوي أنه شعر بالانكسار والخذلان، بسبب عدم التقدير، وفي هذه الحالة، كان يلوم نفسه، موضحًا: مريت بموقف حسيت فيه إني انكسرت لما محدش قدرني، لإني بفترض إني أنا اللي مقصر فبلوم نفسي، على أن الشخص مدنيش قدري، وبقنع نفسي بكده عشان أعلم نفسي أكتر.

وأشار البزاوي إلى أنه، شخص يرتبط بالأشياء والأشخاص بشكل كبير، لذلك يكره الفراق في حياته، قائلا: الفراق أسوأ حاجة في الدنيا، أنا شخص بيرتبط بكل حاجة بالتفاصيل والقعدة والطقوس، الفراق بيفصلني سواء كان من أشخاص أو أشياء.

وأضاف البزاوي: ليا طقوس معينة في البيت، بحب الوحدة جدًا، في بيتي تقريبا معزول، بحب أقعد لوحدي كتير، لمة العيلة دا كلام بنضحك بي على نفسنا مفيش حاجة اسمها كده، أمينة رزق قلت لها يا هانم زمانكم كان كويس؟، قالت لي انتو ليه شايفينا كده؟.