محمد صلاح عزب يهاجم هادي الباجوري: في خط درامي كامل تم إضافته علشان مرات المنتج تمثل
كتبت: ياسمين ياسر
المؤلف محمد صلاح عزب
هاجم المؤلف محمد صلاح عزب المخرج هادي الباجوري مخرج مسلسل “سفاح الجيزة” بسبب إعتراضه على نهاية العمل.
قال عزب في مداخلة هاتفية مع الإعلامية أميرة بدر في برنامج “ملفات” المذاع على قناة هي “كان في خلاف في وجهات النظر وانا مش راضي وهو غير حاجات في نهاية العمل وانا مش حابب اتكلم في تفاصيل لانها كواليس عمل وهو عمل جماعي وانا مكنتش راضي عن المشاهد ودة مش اللي أنا عامله والطبيعي المخرج يدخل لكن في إطار شغله كمخرج مش أنه يدخل في شغل المؤلف”
وتابع “في خط درامي كامل تم إضافته علشان مرات المنتج تمثل وتم تكوين شخصية من الفراغ ومش معروف هي مين ولا جت ليه وعلشان مرات المنتج تمثل وهو مش امين على الورق بالشكل دة فانا مش هتعامل معاه تاني”
وأضاف “وانا من البداية مكنتش موافق على المخرج اصلا، وهادي الباجوري مخرج اعلانات أو كليبات لكن اعماله الدرامية مش بحبها والفيلم الوحيد اللي عمله شبه النوع دة هو فيلم وردة ودة فيلم محدش عارفه اصلا ولما المنتج قالي أن دة المخرج اللي هيشتغل معانا قلتله لا”
واختتم حديثه عن هادي الباجوري قائلا “اللي هو صوره زي ما مكتوب معنديش مشكلة فيه وانا مشكلتي في اللي يتعلق بشغلي، والجزء التاني الحق الوحيد فيه ليه للمؤلف”
وعن سبب عدم وجود أحمد فهمي قال “وأحمد فهمي مش هيكون موجود لأن قصته خلصت وانا من قبل سفاح الجيزة الرابط بالنسبالي في الأجزاء هو القصص المختلفة ومستوحى من أحداث حقيقية دة اللي بيربط الأجزاء”
يذكر أن مسلسل “سفاح الجيزة” بطولة أحمد فهمي، ركين سعد، باسم سمرة، صلاح عبد الله، داليا شوقي، جيهان الشماشرجي، هايدي خالد، من إخراج هادي الباجوري وسيناريو وحوار إنجي أبو السعود وعماد مطر، وتأليف محمد صلاح العزب.
المسلسل يتكون من 8 حلقات وعرض عبر منصة “شاهد vip”.
