كريم الحسيني: المنصات الإلكترونية خطوة عظيمة.. ومستحيل الذكاء الاصطناعي يطلع إحساس شيرين عبد الوهاب

الفنان كريم الحسيني

أعرب الفنان كريم الحسيني عن سعادته، بفكرة تدشين انطلاق أول منصة إلكترونية خاصة بأكاديمية الفنون، مشيرًا إلى أنها خطوة متأخرة كان لا بد العمل عليها منذ فترة.

وقال كريم الحسيني في تصريح خاص: فكرة وجود المنصة الإلكترونية خطوة عظيمة هي جت متأخر، بس خطوة مهمة ووجود المنصات الإلكترونية، لا يؤثر على الوسط الفني، والذكاء الاصطناعي دي حاجة هزار، أصل إزاي يطلعوا إحساس شيرين عبد الوهاب أصلا، أو إحساس وائل جسار.

وتابع كريم الحسيني: إحنا في مرحلة الشباب حاليًا وبنشتغل على الجديد، وأجدادنا اللي سبقونا في الشغلانة، مثل أستاذ نجيب الريحاني، وإسماعيل ياسين، لم يتم تسجيل مسرحياتهم، وحتى الآن لدينا 10 مسرحيات فقط، للأستاذ فؤاد المهندس، والزعيم عادل إمام، وغيرهم، ودا بسبب عدم وجود تصوير وقتها.

وعن رأيه في هجوم الفنانين على أراء الجمهور خلال الفترة الحالية، أوضح: الفنان حر يرد أو ميردش دي حاجة ترجعله ومافيش مشكلة إن هو يرد بطريقة إيجابية، لأن إحنا كمان بنمثل وبنغني علشان نرضي موهبتنا وعلشان الجمهور أيضًا، وإحنا من غير الجمهور ولا حاجة والفنان اللي وصل لمرحلة الزهق، هيرجع تاني نفسه الجمهور يتصور معاه.

وعلى جانب آخر، كرم مهرجان المسرح العربي، الفنان كريم الحسيني في وقت سابق، خلال حفل ختام المهرجان بأوبرا سيد درويش في الإسكندرية، معربًا عن سعادته بهذا التكريم.

علق الفنان كريم الحسيني على فكرة تريند رقم 1، إذ أشار إلى أنه يرفض هذه الفكرة، وأكد أن جميع النجوم يتنافسون من أجل تقديم عملًا فنيًا يليق بالجمهور، والمُشاهد هو من يحدد من هو رقم 1، حيث أشار إلى أنه له الشرف لوقوفه لأول مرة أمام كاميرا كانت مع الزعيم عادل إمام.

وتحدث كريم الحسيني عن هذا الأمر، خلال لقاء تلفزيوني له، إذ قال: الزعيم ده لوحده مش هيطلع زيه تاني، عادل إمام ظاهرة لن تتكر، فنان مُتربع على عرش النجومية 60 سنة مفيش زيه، ويفضل دايمًا بمجده، زي ما عندنا أم كلثوم وعبد الوهاب والعندليب عندنا عادل إمام، وليا الشرف أني اشتغلت معاه في أكتر من فيلم في بداية حياتي، منها فيلم المولد واللعب مع الكبار، وفيلم شمس الزناتي، ليا الشرف أني أول مرة أقف قدام كاميرا كان مع الزعيم.

وأضاف كريم الحسيني: كلنا نمبر وان، كلنا بنتنافس عشان نسعد الجمهور، لما هنبسط الجمهور هنكون سعداء، مش إحنا اللي هنحدد مين نمبر وان ولا مين تو، إحنا بنمثل عشان الناس تعرفنا، وتشاور علينا وتتأثر بينا، الحكم دائما بيكون للجمهور، والجمهور اللي بيحدد.