طارق الشناوي عن أزمته مع مصطفى قمر: هاجمت تامر حسني وهنيدي ومنير ومحدش زعل يا ريت يتعظ منهم

الناقد الفني طارق الشناوي

استنكر الناقد الفني طارق الشناوي هجوم الفنان مصطفى قمر عليه بعد انتقاده له ولفيلمه الأخير، مشيرًا إلى انه سبق وهاجم محمد هنيدي عن فيلمه الأخير وكذلك تامر حسني ومحمد منير ولم ينزعج أحد منهم.

وقال طارق الشناوي في لقاء مع إي تي بالعربي: أنا هاجمت تامر حسني في آخر أفلامه ما زعلش بالعكس كلمني في التليفون وكذلك محمد هنيدي هاجمته في فيلمه الأخير واتقابلنا في مهرجان الدراما ومحمد منير كان ليا انتقادات على بعض أعماله.. هل زعل اطلاقا.. لو عاوز يطلع من الكبوة يتعظ من كل الأسماء دي.

وأضاف طارق الشناوي: ليا الحق أني اتكلم عن مصطفى قمر كمطرب مش الفشل ده بتسمعه بودنك وله علاقة بالحفلات.. وفين أغانيه اللي بتنجح؟ وفيه تلات أغاني طرحها في الفيلم هل الناس رددت حاجة منهم.. فيه هزيمة فنية بيعيشها وبيواجهها وهو بعد كثير عن المقدمة اللي كان فيها لأنه كان مطرب واعد وومثل واعد.

طارق الشناوي: مسامح بشرى 

فيما أكد طارق الشناوي أنه يسامح بشرى عن ردها على انتقاده مصطفى قمر، قائلًا: بشرى منتجة الفيلم دافعت عن فيلمها وليها حق تستغل السوشيال ميديا وتقول ان الفيلم عظيم لكن ما ينفعش تقول أني ما بيعجبنيش أي أفلام وأني ما شفتش الفيلم ومع ذلك سامحتها، أما بالنسبة لخالد سرحان اوعى حد يستخدمك أداة لمهاجمة أحد.

في سياق متصل، أكد طارق الشناوي أنه سيقاضي مصطفى قمر بسبب رده عليه بعد انتقاده فيلمه أولاد حريم كريم مشيرًا إلى أن رده يحمل سبا وقذفا.

وقالت بشرى في تصريحات إذاعية، عن انتقاد طارق الشناوي لـ مصطفى قمر: اللي حصل ده طبيعي لأي عمل يثير الجدل والناقد شغلته ينتقد العمل فنيًا زي الإضاءة والتصوير والمونتاج والاسكريبت، ويتكلم عن أداء الممثلين والوجوه الشابة في العمل، والحقيقة ده محصلش اللي حصل مجرد رأي في برنامج مش مكتوب مقالة زي ما معروف عن السادة النقاد، والنقد لم يكن مهني ولا ليه علاقة بأي طرف من الفيلم، النقد كان لشخص بطل الفيلم وكمان كمطرب مش ممثل، إيه علاقة ده بـ أبطال العمل؟.

وتابعت: الموضوع فيه عاطفة ومينفعش تهاجم نجم كبير عنده 35 سنة تاريخ، صعب اختزال مشوار نجم كبير أعماله ناجحة ويكاد يكون من أكتر المطربين اللي أفلامهم نجحت في السينما، وكمان تتجاهل اللي الفيلم يعني محدش فينا جه وتعب؟ مدرسة لم ينجح أحد؟ قاسي شوية وهو لسه مكتبش، والحقيقة أستاذ طارق متنتقدش الفيلم طالما مكتبش مقالة زي ما معروف عن النقاد.

بشرى: مصطفى قمر رد على طارق الشناوي لأن النقد كان فيه شخصنة

أما عن رد الفنان مطفى قمر على الناقد طارق الشناوي، فعلقت بشرى قائلة: مصطفى قمر رد لأنه وجد في الكلام شخصنة، وأيًا كان اسم الناقد هل ده يعطيه الحق أنه يشتم إنسان؟ لأ هو في الآخر مواطن وفي قانون، ولما تلاقي الهجوم شخصي طبيعي الرد يكون شخصي، والحقيقة أن لو حد شتمني هعمله محضر في القسم وهقوله أنت مش من حقك تشتمني وبتشتمني على أي أساس.

وأضافت: مصطفى اضطر يرد بشكل شخصي خاصة أنه انتقده كمطرب مش ممثل، وأنا معنديش نية للتدخل لأن في ود واحترام متبادل بيني وبين أستاذ طارق، وإحنا الاتنين أعضاء في لقاءات سينمائية مختلفة في البلد وبرا البلد، ولما لاقيت أن الموضوع فيه كلام دخلت قولت رأي من غير تطاول ورأي الجمهور في رأيي، وهذا الصراع بعيد عن فيلم أولاد حريم كريم.

وأكدت بشرى قائلة: أنا ضد مهاجمة الفنان مصطفى قمر، وأنا من الفانز بتوعه، ولكن أنا شايفة أن ده صراع جانبي ومالوش علاقة بالجمهور، والجمهور زكي جدًا ومبيتضحكش عليه، وأنا ساعات بتسلل في صالات السينما وبدخل أشوف الناس بتضحك ولا لأ، وبلف على السينمات وبشوف، والضحك مش هنجامل فيه، وهي الناس هتجامل عمرو عبد الجليل أو خالد سرحان؟ الفيلم لذيذ وفيه طُرفة.