الفنانة جومانا مراد
أعربت الفنانة جومانا مراد عن سعادتها بحضورها مهرجان القاهرة للدراما في دورته الثانية، مشيرًا إلى أنها معتادة على وجود مهرجانات سينمائية وليست درامية كما هو بمهرجان القاهرة للدراما.
وقالت جومانا خلال لقائها مع المذيعة بوسي شلبي في برنامج ليالي Ten على قناة Ten: الدراما شيء مهم جدًا وأنا ابتديت دراما وسعيدة بتواجدي بمهرجان الدراما وبقى فيه مهرجان للدراما ودايمًا متعودة على مهرجانات للسينما مش للدراما وبقول للناس لازم تيجو العلمين والساحل، وسعيدة بالحضور الكبير للفنانين والتنظيم في غاية الجمال، وسعيدة إن دكتور يحيى الفخراني رئيس المهرجان والحمد لله.
وأردفت جومانا: بقالي 16 أو 18 سنة بشارك في الدراما المصرية وليا تاريخ فيها، دايمًا بقول كلنا اتربينا على الدراما المصرية ودراما فارضة نفسها وبقوة وهي الأساسية اللي نشأنا عليها ومبسوطة بالتنوع والتطور اللي بيحصل فيها دلوقتي، وتقنية تصوير المسلسلات بقيت سينمائية واختلفت عن دراما زمان ويمكن بقى فيه جرأة في الطرح ومنصات ومحطات أكتر بتبسط بالنجاح ده وبكل ما فيه محطات ومنصات أكتر وتبقى الحركة الفنية كبيرة من كتاب وممثلين ده كله بيساهم في إثراء الدراما.
تحدثت الفنانة جومانا مراد عن رأيها في الهجوم الذي تعرض له الفنان جمال سليمان بسبب مسلسل عملة نادرة واللكنة الصعيدي، وبجانب ذلك حديثها عن الموت وخوفها منه.
وقالت جومانا مراد : جمال سليمان فنان كبير وعظيم وتاريخ كبير، وهو كان نجم في سوريا وعمل صعيدي أكتر من مرة قبل عملة نادرة، قدم حدايق الشيطان وأفراح إبليس وجماهيرته جت من الصعيدي.
وعن خوفها من فكرة الموت بعد وفاة والدها وابنتها، أوضحت جومانا: بدعي ربنا دايما أنه مياخدونيش غير وهو راضي عني، وبخاف من لقاء ربنا.. وبحاول دايما أني أقدم لأخرتي.. وعيلتي كلها محجبة وربنا يهديني واتحجب.
واختتمت جومانا مراد حديثها: مبخافش من الموت لأن دي حقيقة، وحسيت أن الدنيا كلها طبطبت عليا بعد وفاة بنتي، وكان في مظاهرة في حبي أكتر ما هو موت بنتي.
أعمال جومانا مراد الجديدة
أما عن أعمالها الجديدة، أضافت جومانا مراد: فيه حاجات كتير معروضة بس أنا في إجازة، ومستنية في شهر سبتمبر الحالي هينزل مسلسل بقالنا فترة عاملينه مفترق طرق، وهند صبري وإياد نصار وماجد المصري، وإن شاء الله يحقق نجاح كبير وهو النسخة العربية من المسلسل الأمريكي The Good wife.
