الفنان محمد ممدوح
تحدث الفنان محمد ممدوح عن فيلمه الجديد وش في وش والمقرر عرضه الليلة بدور السينمات 16 أغسطس الجاري، إذ تحدث عن كواليس العمل وتعاونه مع الفنانة أمينة خليل.
وقال ممدوح في لقاء ببرنامج مساء الإمارات، عبر قناة الظفرة: بحب أمينة خليل جدا، والحمد لله ربنا موفقنا مع بعض، وهي بتحب شغلها وبتاخد بالها ومجتهدة جدا وبحب أشتغل معاها وفيلم وش في وش تجربة جديدة عليا وهو فيلم اجتماعي وفكرته جديدة وسعيد بكل المشاركين معايا في العمل، وبحب أشتغل مع المنتج أحمد فهمي، وأنا ومحمد شاهين أصحاب من قبل التمثيل.
محمد ممدوح يتحدث عن أعماله المقبلة
كما كشف محمد ممدوح خطة أعماله الفترة المقبلة، قائلًا: إنهم يحضرون في الفترة الحالية لبنك الحظ 2، حيث يواصلون العمل على السيناريو، كما كشف أنه يتمنى العمل في أولاد رزق 3 قائلًا: كلموني بخصوص المشاركة في أولاد رزق 3، ونفسي أشتغل معاهم تاني، وبحب أحمد عز وبينا كيميا، وهو ممثل محترف وبيجتهد في شغله والناس بتحبه.
كما كشف محمد ممدوح أنهم انتهوا مؤخرًا من تصوير فيلم شقو، مضيفًا: هتتفاجئوا بوجود دينا الشربيني في العمل، وعمرو يوسف من أعز أصدقائي، ودعمني منذ بداياتي في مسلسل ظرف أسود، وبعتبر أحمد أمين من أهم الممثلين في مصر، ومبسوط إننا هنشتغل تاني مع بعض في مسلسل قصة المدينة في رمضان المقبل 2024.
أمينة خليل: محمد ممدوح مش أناني
وأشادت بمحمد ممدوح، قائلة: هو ممثل مش أناني، دايما بيخلي الممثل اللي قدامه يطلع أحسن حاجة عنده، ودي أكتر حاجة بحبها فيه، وإحنا تفكيرنا متناسق جدًا في اختيار الأعمال، ودي حاجة بحبها أوي وهو قلبه أبيض.
وعن تشابه الفكرة العامة لفيلم وش في وش، مع مسلسل أمينة خليل الأخير، الهرشة السابعة، قالت: أنا مختارتش إني أناقش نفس الموضوع في عملين ورا بعض، برغم إني شايفة إن كل عمل فيهم بيناقش قضايا الزواج بطريقة مختلفة، واحد دراما جدا وواحد كوميدي جدا، فممكن الناس تكون شايفة إن العملين بيناقشوا نفس الموضوع ولكن هما بطريقة مختلفة تماما.
