مدحت العدل مدافعًا عن تجربة عمرو مصطفى لإحياء صوت أم كلثوم: “سيبوا الناس تجرب يمكن نعمل حاجة كويسة”

السيناريست مدحت العدل

كشف الكاتب والسيناريست مدحت العدل، عن رأيه في الجدل المثار حول استخدام الملحن عمرو مصطفى صوت أم كلثوم في الذكاء الاصطناعي.

وقال مدحت العدل خلال مداخلة هاتفية ببرنامج كلمة أخيرة: من الناحية القانونية المجردة طالما المنتج أدى وسدد الحقوق المادية والمعنوية، فقد صنع ما عليه وذلك بالشكل القانوني بالشكل المجرد رأيي المجرد لكن كفنان ليه بنخاف من التجارب؟، مانسيب الراجل يجرب ونبقى نرفضه ويمكن يطلع حاجة كويسة، الذكاء الاصطناعي بيستخدم كتير في العالم.

وتابع مدحت العدل: ليه بنخاف من التجارب؟، بلاش فكرة التابوهات وكل ما حاجة تتجرب نقول الدنيا هتتهد، محمد سعد غنى في فيلم اللمبي حب إيه، ومع ذلك تبقى أم كلثوم ما تسيبوا الناس تجرب، ما يمكن تطلع حاجة كويسة.

عمرو مصطفى: في ثورة حاصلة عن الذكاء الاصطناعي في العالم كله 

وكان علق عمرو مصطفى عن أزمة أغنية أم كلثوم بالذكاء الاصطناعي، قائلًا: في ثورة حاصلة عن الذكاء الاصطناعي في العالم كله وأي إنسان يا إما هياخذ الثورة الموسيقية ويطلع بيها ويطورها ويكبر بيها يا إما يقعد يلعب بيها، عندنا الآن تكنولوجيا جديدة تخلينا نطور ده ونقول في ملحنين موجودين.. الخريطة كلها تتغير وقواعد اللعبة بتتغير.

وتابع عمرو مصطفى: حقوق ملكية إيه ومقاضاة إيه اللي بيتكلم عليها.. أنا بعمل أغنية جديدة من الألف للياء وصوت أم كلثوم ملك الآلة.

وكان قد تحدث الفنان عمرو مصطفى عن تفاصيل ألبومه الجديد، الذي يحمل اسم “مالوش زي”، وتم طرحه في عيد الفطر الماضي، وقال: الأغاني الجديدة كانت متبقية من الألبوم اللي فات، وقررت يوم وقفة عيد الفطر طرحها، لأن الناس محتاجة جرعات أغاني جديدة.

وتابع: وأنا حاليًا شغال على ألبومي الجديد واللي هيطرح خلال فصل الصيف الجاي.تابع مصطفى: مالوش زي تركيبة موسيقية مختلفة، وأنا حبيت أعيد على الناس والجمهور كان واحشني، كمان لحنت أغاني مسلسل جت سليمة للفنانة دنيا سمير غانم اللي اتعرض في شهر رمضان، وكلها كانت تريند.

واستكمل: من الآخر عمرو مصطفى مالوش زي عشان يكون ألبومي اسم على مسمى، أنا الفترة الجاية هغني بس وعايز الناس تنسى عمرو مصطفى بتاع الخناقات.