بعد 23 عاماً.. ميار الببلاوي تكشف أسرارا في قضية وفاء مكي تذاع لأول مرة: البنات مكنوش محروقين

الفنانة ميار الببلاوي

كشفت الفنانة ميار الببلاوي أسرارا تذاع لأول مرة في قضية الفنانة وفاء مكي حول تعذيب الخادمتين بعد مرور 23 عاما على تلك الحادثة.

وقالت ميار الببلاوي في تصريحات لبرنامج صبايا الشمس مع الإعلامية ريهام سعيد: “الموضوع تم فتحه حاليا وانا متكلمتش فيه وأنا مريضة قلب ومفيش مرة دخلت عملت عملية وبقيت قبلها أدعي ربنا يمد في عمري لحد مقول كلمة الحق”.

وأضافت: “أنا كنت عاوزة أقول حاجة بس مش عارفة الطريق وجوايا صراع أن كلامي دا هيعمل حاجة ولا لا بقالي 23 سنى تعبانة وبقول يا ترى لو كنت قولت شهادتي كان هيتاخد بكلامي”.

وروت تفاصيل الحكاية قائلا: “لما اتجوزت مكنتش شاطرة ومش بعرف أعمل حاجة في البيت وجوزي كان عاوز يجبلي ناس تساعدني كان معايا بنت بتساعدني مدة طويلة واتجوزت ومشيت وبوابة العمارة قالتلي في واحدة تحت معاها بنتين عاوزين يشتغلوا”.

وتابعت القصة قائلة: “بنت منهم هرشت في شعرها ولقيت شعرها أقرع وقولتلها ايه دا قالتلي دول اللي كانوا عند الأستاذة وفاء مكي والبنت عندها قراع ووفاء حلقتلها شعرها ورفضت أن تعملا البنتين معي ولكنهما كانتا بصحة جيدة لكون بدون شعر وخفت منها أن تعدي ابني”.

وواصلت: “شهادتي اللي بقولها إن البنات جم من عند وفاء مكي مكانوش محروقين ولكن حالقين شعرهم والست مشيت وخدت البنات وتفاجأت بكلام الجرائد بتعذيب البنات ولما شفت صورهم قولت ادة دول اللي الست كانت جيباهملي وكلمت صحفي معروف وكان صديق عزيز ليا انا ووفاء وقولته الموضوع دا غلط ووفاء معملتهمش حاجة وهما جم من عند وفاء مكي لعندي ثم راحوا البلد والمصور قالي فيه شخصية عاوزة تأذي وفاء وكلامك مش هيودي وهيأخر”.

واختتمت: “كل الكلام دا كان من 23 سنة وربنا مد في عمري عشان اقول كدا والحمد الله اني قولت والموضوع دا كان تاعبني”.

وقالت هند عاكف: ميار كلمتني نفسيتها منهارة وعايزة تخلص ضميرها وبتقولي أنها معاها جواب هو دليل براءة وفاء مكي.

دعمت الفنانة هند عاكف زميلتها الفنانة وفاء مكي في أزمتها التي كشفت عنها خلال الساعات الماضية، ومعاناتها بسبب عدم الاستعانة بها في أي أعمال فنية، مما جعلها تعاني من الديون وضيق الحال.

وكتبت هند عاكف، عبر حسابها الشخصي على «فيس بوك»: «دي قضية جيل بالكامل، أحب أضم صوتي لصوتك يا وفاء، أدعم الفنانة وفاء مكي وأدعم كل زملائي وجيلي اللي أتظلم وقاعد في البيت، حرام وعيب اللي بيحصل ده، هو لازم نطلع نتكلم ونشتكي ونشرح ظروفنا وأسرار بيوتنا على السوشيال ميديا عشان نشتغل؟».

وأضافت: «من المسؤل عن ذلك ولامتى هيستمر الوضع الغلط ده، إحنا جيلنا تعب كتير وشال مسلسلات وأعمال فنية كتير ناجحة».

وتابعت: «بطالب المسؤلين عن صناعة الفن وعمل المسلسلات والأعمال الفنية التدخل السريع لوجود حلول سريعة لحل هذه المشكلة التي تهدد حياة الكثير من الفنانين والمبدعين، ويكون في عدالة في توزيع الأدوار في المسلسلات والأعمال الفنية على جميع الممثلين، بجد إحنا في أزمة كبيرة.. كارثة بمعني الكلمة».