محمد محمود عبد العزيز: والدي نصحني أنا وكريم منمثلش.. وممكن إشاعة تقعد فنان في البيت

الفنان محمد محمود

تحدث الفنان محمد محمود عبد العزيز، عن نصيحة والده الفنان الراحل له، كما كشف معاناة الأخير، حتى وصل إلى هذه المراتب العالية بالفن.

وقال محمد محمود عبد العزيز، خلال ندوته: أبويا نصحني أنا وكريم إننا منمثلش، وبدأنا نفهم مؤخرا سبب كلامه؛ لأن الشغلانة صعبة جدا، أنت ممكن تشتغل النهاردة وبكرة ولمدة سنين لا. 

وتابع: ممكن فنان يقعد في البيت بإشاعة واحدة تطلع عليه، أيا كان حجم نجوميتك، زي إن حد يقول عليك إن الممثل ده مش بيحفظ ويذاكر، أو بيضرب أوردرات، وبدأت استوعب ده لما بدأت أدخل في المجال أكتر، اكتشفت إنها شغلانة مسؤولياتها كتير وملهاش أمان ولا ضمان. 

وأضاف محمد محمود عبد العزيز: وفي الاول كنت عايزة أدخل معهد سينما بس أبويا رفض وقالي كمل في التمثيل لو حابب بس ادرس حاجة تانية؛ عشان لو متوفقتش تكون معاك أداة تانية تشتغل بيها. 

ثم تطرق للحديث عن معاناة والده الفنان محمود عبد العزيز، قائلا: أبويا تعب جدا عشان يوصل للي هو فيه، ومجالوش كل ده على طبق من دهب، هو كان دارس زراعة وعامل ماجستير في نحل، إلى جانب حبه للفن والتمثيل، وسافر النمسا وباع جرايد، ونام في محطات قطر واتبهدل.

وكشف محمد محمود عبد العزيز، طرقه المتبعة للتغلب على مشكلة عدم الاستقرار المادي الذي يعيشه الفنان، وقال: بحاول أخرج من الوسط الفني وأعمل مشروع، بس بلاقي نفسي لسه غارس فيه، لما روحت عملت شركة إنتاج، بس لأت هنا أنا هعرف أتعامل وأتصرف لأني بفهم في المجال كويس، بس مازلت بدور على مشروع مختلف.

تحدث الفنان محمد محمود عبد العزيز عن زوجته وابنته تمارا، مشيرًا إلى أن زوجته جزائرية فرنسية، ولقائهما كان صدفة ولم يكن متوقعًا.

وقال محمد محمود عبد العزيز خلال ندوة تكريمه مش مقصود أنها ما تكونش مصرية لكن في حاجات كتير مشتركة بينا منها علاقتنا بأهلنا وطريقة حياتنا واعتماد كل واحد على نفسه ومفيش حد منتظر حاجة من حد.

وأضاف محمد محمود عبد العزيز: كنت بتكلم معاها شخصيًا من قريب وقلت لها التركيبة دي جت إزاي مش فاهم لأن احتمالية إننا نتعرف على بعض كانت واحد في المليار، ووقتها سافرت فرنسا 4 أيام وهناك عرفتها ولما رجعت فضلت العلاقة موجودة وكنا بنتكلم، وبدأت العلاقة تكبر ويحصل ارتباط وجواز، وتخلل ده كورونا وماكناش عارفين نشوف بعض لكن ربك رايد حاجة بتحصل.

مسلسل حضرة العمدة 

على جانب آخر، حقق محمد محمود عبد العزيز نجاحا كبيرا، من خلال مسلسل حضرة العمدة، الذي عرض في موسم رمضان 2023، وهو من بطولة الفنانة روبي، بسمة، إدوارد، أحمد رزق، وآخرين، ومن إخراج عادل أديب.