جينات الموهبة الفنية
كتبت: ياسمين ياسر
علقت الفنانة شهيرة على الانتقادات التي يتعرض لها دائمًا أبناء وأحفاد الفنانين، بسبب اتجاههم للمجال الفني.
وقالت شهيرة في تصريح خاص: كل حد له شخصيته المختلفة محدش بيمشي على خطى أهله، لكن أقدر أقول إنهم واخدين جينات الموهبة الفنية، الناس بتقعد تقول هما أولاد الفنانين لازم يبقوا فنانين؟ آه لازم يبقى فنانين.
وتابعت شهيرة موضحةً سبب اتجاه أبناء الفنانين إلى التمثيل، قائلةً: دي بتكون جينات يعني الدكتور عادةً ابنه بيبقى دكتور، والمحامي بيحب ابنه يبقى محامي، اشمعنا بقى في الفن بيقولوا مفيهوش جينات.
واختتمت شهيرة حديثها قائلةً: بالعكس ده الفن بيتوارث لأن دي جينات غصب عن أي حد، الأولاد بيتأثروا بالجو المحيط بيهم، بالإضافة إلى إن ربهم خلق جواهم الجينات دي، لما يبقى أبوهم وأمهم وجدهم وجدتهم يعني فيه انتشار.
شهيرة تعلق على مقارنة الفنان بالموظف
على جانب آخر، علقت شهيرة مؤخرًا، على فكرة المقارنة بين عمل الفنان والموظف، وذلك في تصريح خاص ، حيث قالت: موظفين إيه وإزاى يعني إنسان موهوب عنده موهبة ربنا إدهاله والناس كلها بتقف وتتفرج عليه وبتتعلمي منى ومن الحاجة اللي أنا بديهالك من خلال الدراما أو بتنبسطي، إنما الموظف قاعد على مكتب بيكتبله كلمتين ويروح، إيه المقارنة الغريبة دي؟! لأ طبعًا هناك فرق بتتكلموا إزاي.
وتطرقت شهيرة للكشف عن رأيها في تقديم عمل مسرحي عن الشيخ الشعراوي، وقالت: طب وماله إيه العيب في كده الناس اللي بتعترض خلاص كل واحد ودماغه، الشعراوي ده علامة لن يعوض ممكن تكون ليه أفكار متزمتة شوية، لكن مش معني كده أن إحنا نقضى على كل العلم اللي علمه لينا يكفي تفسيره للقرآن، ونظرته البعيدة للتفسير بين سطور الآيات.. الشعراوي لن يتكرر.
شهيرة ترد علي الانتقادات التي تعرضت لها فردوس عبدالحميد
وعلى جانب آخر، أبدت شهيرة رأيها في الانتقادات الذي تعرضت لها الفنانة فردوس عبد الحميد مؤخرًا بعد مشاركتها في مسلسل الضاحك الباكي، عن قصة حياة الفنان الراحل نجيب الريحاني.
وقالت شهيرة، خلال تصريحات تلفزيونية: أرفض التجاوز والتطاول على رموز وناس لديها أثر على حياتنا الفنية قدموا فيها روائع، مضيفة أن العديد له رأي ولا يتفق على رأي واحد ومن الطبيعي أن يكون لدينا آراء مختلفة، ولكن بأسلوب مهذب ولا يتم التطاول على شخصيات فنية كبيرة، فأصبح شيئا مقززا وزيادة عن اللازم.
